Góður lokasprettur dugði gegn Grindavík, 84-73
Leikurinn byrjaði vel og af miklum krafti, staðan 33-20 eftir fyrsta leikhluta. En svo slökuðu heimamenn á, full mikið, og gestirnir úr Grindavík gengu á lagið og söxuðu á forskotið. Einbeiting Keflavíkurliðsins fauk út í veður og vind og skotnýtingin var skelfileg, jafnvel hjá landsins bestu skyttum. Hægt og rólega minnkaði forskotið og Grindavík jafnaði loks í stöðunni 69-69 og aftur í 73-73 þegar tæpar tvær mínútur lifðu leiks.
En þá hrukku okkar menn loks í gírinn, eftir að hafa verið í hlutlausum ansi lengi. Maggi gaf á Nick í hraðupphlaupi sem átti glæsilegt "viðstöðulaust-afturábak-layup" og skömmu síðar átti Jonni flottustu tilþrif kvöldsins þegar hann greip frákast frá Nick hátt fyrir ofan hringinn og hamraði boltanum í gegnum hringinn. Strax á eftir náði Jonni frákasti og Arnar brunaði upp, settann oní og fékk víti að auki. Sem sagt, 100 góðar sekúndur í lokin og sigurinn var Keflvíkinga. Frekar slakur leikur, en afar góður endir.
Nick átti flottan leik og er í svaka formi, 26 stig og 12 fráköst. Arnar var sprækur, en aðrir voru undir getu, þótt flestir hafi átt ágætu stutta spretti.
Nú er rétt að fara að gyrða brækur í brók og ná fókus, því stórleikur er í vændum. Bakken Bears, dönsku meistararnir, koma í heimsókn á fimmtudaginn og þá verður kátt í Sláturhúsinu, stefnan er að vera ósigraðir á heimavelli og ef stemmingin í leikmönnum og áhorfendum verður lík því sem hefur verið á Evrópuleikjunum megum við búast við stórkostlegri skemmtun!
