Keflavíkingar komnir í úrslit á móti Snæfell
Keflavík sigraði ÍR með miklum yfirburðum í Seljaskóla í kvöld. Lokatölur 72-97 eftir að staðan í hálfleik hafði verið 24-51.
Eftir að hafa farið í Seljaskóla á mánudaginn síðasta og upplifað frábæra stemmingu bæði hjá leikmönnum og ekki síður áhorfendum, þá bjóst maður við að ÍR myndu mæta vel undirbúnir og tilbúnir í leikinn. Bannað var að koma með trommur og annað sem hjálpar við að halda uppi stemmingu, fannst þeim lætin og stemmingin of mikil í síðasta leik. Þetta hafði ekkert að segja, áhorfendur mættu öflugir í leikinn og létu vel í sér heyra. Leikurinn fór frekar rólega af stað, Maggi og Jonni heitir. Staðan eftir fyrsta leikhluta 12 - 20. Annar leikhluti var sá besti sem Keflavík hefur spilað í ár, og vörnin hreint frábær. ÍR sem hafði komist þetta langt í úrslitakeppninni á góðri baráttu, var gjörsamlega slegið út af laginum og komust vart yfir miðju. Pressuvörnin hjá Keflavík var svakaleg á þessum kafla og allir leikmenn að spila hana 100%. Sverrir og Jonni börðust eins og sannir stríðsmenn sem ætluðu sér sigur í þessari orustu. Gunni Stef. kom sterkur inn og fullur sjálftrausts og setti niður þrjá þrista í leiknum. Davíð kom einnig sterkur af bekknum og barðist vel. Staðan eftir þennan frábæra kafla var 24-51 og 27 stiga forusta staðreynd. Á þessum kafla má segja að Keflavík hafi verið búið að gera út um leikinn
Í seinni hálfleik byrjaði Keflavík aftur af krafti með Magga og Sverri í fararbroti. Sverrir var ekki bara að spila fanta vörn heldur átti hann mörg falleg gegnumbrot og góðar sendingar. Maggi var sjóðheitur fyrir utan 3 stigalínuna. Keflavík komst mest 34 stigum yfir 28-62 og þeir leikmenn sem spilað hafa mest í vetur komnir á bekkinn. Leikinn kláruðu svo Gunni E. Davíð, Sævar, Halldór og Gunni Stef. Allir 12 leikmenn komust á blað í leiknum enda hefur Keflavík á að skipa góðri liðsheild. Lokamínutur leiksins voru lengi að líða, enda leikurinn í raun löngu búinn.
Liðið lék allt vel í leiknum og erfitt að taka einhvern úr og hrósa fyrir framistöðu. Sverrir barðist vel eins og oft áður en var líka mjög ógnandi í sókn, Jonni spila frábæra vörn og tók 9 sóknarfráköst, Maggi skoraði 4 stiga körfur og 20 stig á 23 mínutum. Gunni Stef. skoraði 14 stig á 18 mín. og svona mæti lengi telja.
ÍR fær hrós skilið fyrir að komast þetta langt, að slá út bikarmeistara Njarðvík var eitthvað sem kom mörgum á óvart, nema þeim sjálfum. Þeir mætu líka einbeitir í fyrsta leik í Keflavík og unnu sannfærandi sigur. Það sem vantaði kannski uppá er meiri reynsla og breidd. Einnig verður að minnast á að mjög fáir stuðningsmenn liðsins sjá ástæðu til að fylgja liðinu á útileiki. Áhorfendur skipta miklu máli þegar svona langt er komið í úrslitakeppni og geta skipt sköpum. Í liði ÍR eru margir ungir leikmenn sem hafa lært mikið og koma enn sterkari til leiks á næsta tímabili. Takk fyrir ÍR fyrir drengilega keppni.
Stigahæstir í kvöld voru Maggi 20 stig. Gunni Stef. Sverrir og Nick með 14 stig og Nick með 10 stig. Tölfræði_úr_leiknum_hér.
Keflavík og Snæfell mæstast því annað árið í röð í Úrslitaleikjum um Íslandasmeistaratitilinn.
Fyrsti leikurinn verður á föstudaginn kl 19.15 í Keflavík. Leikur 2. verður á Stykkishólmi á mánudaginn kl.19.00. Leikur 3. verður í Keflavík á fimmtudaginn 7. apríl kl. 19.00
Mynd af vf.is
