Tímavörðurinn Pistill 13
Tímavörðurinn vill byrja á að þakka Risanum og Stefáni fyrir að reka á eftir pistli, gott að vita að það séu ekki allir búnir að gleyma Tímaverðinum.
Það er merkilegt hvað liðið okkar getur spilað vel á góðum degi og staðið í atvinnumannaliðum sem koma frá sterkum deildum í Evrópu. Þess vegna er það ennþá merkilegra hvað liðið getur spilað hrikalega illa á slæmum degi. Tapleikurinn á móti Hamri er þar efst í huga.
Getur verið að þegar mótherjinn er sterkur og við verðum að vera með hugann 100% við leikinn, þá náum við því besta úr okkar leikmönnum. Svo þegar spilað er á móti liðum í neðri parti deildarinnar, sem á pappírum ættu að vera auðveld bráð, gengur ekkert upp.
Það sést líka vel á mætingu á þessa leiki, að fólk hefur mestan áhuga á stóru leikjunum, og fylgjast með því þegar liðið leggur sig 100% fram. Það er eðlilegt að fólk nenni ekki að mæta, þegar leikmenn mæta einungis líkamlega í leikina en ekki andlega.
Hvað er til ráða? Það virðist ekki vera nóg að tvö stig séu í boði sem færa okkur nær toppi og betri stöðu í deildinni. Verðum við að búa til einhverja aðra “gulrót” fyrir leikmenn svo þeir mæti af fullum hug í leikina?
Hugmyndir:
1. Hvernig væri að velja mann leiksins sem fengi svo út að borða fyrir tvo á SOHO, líkt og er gert í fótboltanum.
2. Ef liðið heldur 100 stiga meðal stigaskori í leik, nokkra leiki í röð fer það saman í Snóker/keilu.
3. Koma á meiri samskiptum á milli leikmanna og áhorfenda, þannig að báðir aðilar peppi hvorn annan upp. (samanber Alli á árum áður)
4. Á móti lélegum liðum, lágmark ein troðsla í fjórðung. Þriggja stiga frá miðju. Ofl. (má reyna þegar komin er 15 stiga forysta)
5. Sá leikmaður sem er áberandi lélegastur í leiknum verður að bera töskuna fyrir þann stigahæsta. (þjálfari velur).
Þetta eru einungis hugmyndir og þær þyrfti að útfæra, þurfa ekki endilega að vera allar í gangi í hverjum leik, bara ákv. fyrirfram á hvað á að stefna.
Það er gríðarlega mikilvægt að leikmenn hafi gaman af því sem þeir eru að gera, og er það þá fljótt að smita útfrá sér. Meiri gleði, og meira fjör = fleiri áhorfendur.
Gleðilegt ár.
Tímavörðurinn.
Ath. skoðanir Tímavarðarins eru einungis hans og endurspegla á engan hátt skoðanir Körfuknattleiksdeildar Keflavíkur.
