´Förum í einvígið af fullum krafti''
Karfan.is tók viðtal við Jón Norðdal Hafsteinsson og Hrafn Kristjánsson þjálfara Þór fyrir leikinn í kvöld. Hér má lesa viðtölin.
Keflvíkingar máttu sætta sig við að tapa 2-0 gegn Snæfell í fyrstu umferð úrslitakeppninnar í Iceland Express deild karla í körfuknattleik í fyrra. Síðan þá hefur mikið vatn runnið til sjávar og í kvöld munu deildarmeistarar Keflavíkur fá Þór Akureyri í heimsókn í fyrstu umferð úrslitakeppninnar. Leikurinn hefst kl. 19:15 í Toyotahöllinni í Keflavík en það lið sem fyrr vinnur tvo leiki kemst áfram í undanúrslitin. Jón N. Hafsteinsson leikmaður Keflavíkur segir að von sé á hörku seríum á öllum vígstöðvum í fyrstu umferðinni.
,,Deildin hefur aldrei verið jafn sterk og hún er núna og öll liðin í 8-liða úrslitum eru virkilega sterk. Hver sería verður hörku sería og flottir leikir allsstaðar,” sagði Jón N. Hafnsteinsson og upplýsti að Keflvíkingar væru mjög einbeittir að sjálfum sér og litu minna til andstæðinganna.
,,Við hugsum fyrst og fremst um okkar eigin leik og spáum ekki það miki í andstæðingum okkar yfir tímabilið. Nú þegar er komið að úrslitakeppninni þurfum við að brjóta þetta aðeins meira niður og skoða hin liðin og sjá hvaða þætti þarf að leggja áherslu á og hvaða leikmenn þurfi að stoppa. Þá þurfum við einnig að kafa dýpra í okkar leik,” sagði Jón en Keflavík vann báðar deildarviðureignir sínar gegn Þór í vetur en það var áður en Þór bætti við sig hávöxnum enskum leikmanni.
,,Þórsarar eru með nýjan leikmann sem við mættum ekki í vetur en við unnum báða leikina og það hefur samt lítið að segja núna. Við verðum bara að fara í einvígið af fullum krafti og leika okkar leik því þá á þetta að hafast,” sagði Jón hvergi banginn.
Þór Akureyri tekur nú þátt í úrslitakeppninni í fyrsta sinn síðan árið 2000 en þá duttu þeir út gegn Haukum og fór einvígið 1-2 Hauka í vil. Nú mæta Þórsarar í Toyotahöllina í Keflavík kl. 19:15 í kvöld og mæta Deildarmeisturunum sem unnu báðar deildarviðureignir liðanna þetta árið. Keflavík og Þór mættust síðast í fyrstu umferð úrslitakeppninnar árið 1995 og vann Keflavík einvígið 2-0. Hrafn Kristjánsson þjálfari Þórs segir að ef sínir menn berjist og séu þokkalegir í hausnum eigi Þórsarar að geta veitt öllum liðum góða samkeppni.
,,Þetta átti allt að vera samkvæmt plani og við ætluðum að tryggja okkur inn í úrslitakeppnina gegn Tindastól á heimavelli en okkur tóks eftirminnilega að klúðra því þannig að við urðum að draga eitthvað sérstakt upp úr hattinum þessar síðustu tvær umferðir í deildinni,” sagði Hrafn í samtali við Karfan.is.
Þórsarar komu inn í úrslitakeppnina á síðustu metrunum þar sem þeir áttu þann eina kostinn vænstan að vinna Snæfell á Akureyri. Tap hefði þýtt að annaðhvort Stjarnan eða Tindastóll hefði komist í úrslitakeppnina en Þórsarar skelltu bikarmeisturunum og náðu settu marki fyrir tímabilið, sæti í úrslitakeppninni.
,,Í síðustu umferðum höfum við reynt að losa okkur við þann hugsunarhátt að við þurfum að gera eitthvað sérstakt til að vinna þessi lið. Ef við ætlum okkur á annað borð að vera í úrslitakeppninni verðum við bara að trúa því að við séum búnir að ná þeim styrkleika með þann hóp sem við höfum núna til þess að láta til okkar taka,” sagði Hrafn. ,,Ef við berjumst og erum þokkalegir í hausnum þá eigum við að geta veitt öllum liðum góða samkeppni,” sagði Hrafn sem telur að Þór raðist ágætlega upp gegn deildarmeisturum Keflavíkur.
,,Keflvíkingar eru óskamótherjar okkar eins og hvert annað lið og eftir að við fengum okkar Englending í hópinn tel ég okkur raðast ágætlega á móti Keflavík. Þetta snýst um spennustjórnun og að stjórna hraða leiksins. Það er reyndar ekki það auðveldasta gegn Keflavík en ef okkur tekst það þá tel ég okkur í eins góðum málum á móti Keflavík og hverju öðru liði í deildinni,” sagði Hrafn sem kom með Þórsara upp úr 1. deild inn í úrvalsdeild og er nú kominn með þá í úrslitakeppnina.
Það er mikilvægt að Jonni leiki vel í kvöld
