Á aðalfundi körfuknattleiksdeildarinnar var farið yfir árið 2002
Aðalfundur deildarinnar var haldinn föstudaginn 30. janúar. Þar kynnti m.a. gjaldkeri deildarinnar, Guðsveinn Ólafur Gestsson, ársreikninga. Þar kom fram að almanaksárið 2002 var rekið með tæpra hálfrar milljóna kr. hagnaði fyrir fjármagnsliði, en að þeim frádregnum var reksturinn á núlli. Annars er almanaksárið ekki hentugt til að gera upp körfuboltastarfsemi þar sem leiktíðin stendur yfir frá hausti til vors.
Á aðalfundinum var stjórnin endurkjörin, enda óhentugt að skipta um stjórn á miðri leiktíð. Boðað verður til framhalds-aðalfundar að leiktíð lokinni þar sem kosið verður til stjórnar.
Fundarstjóri var Einar Haraldsson, formaður félagsins, og stýrði hann fundinum af alkunnri röggsemi. Umræður voru ekki miklar í þetta skiptið þar sem fundargestir vildu komast heim og horfa á Ísland-Spán í handbolta!
Hrannar Hólm, formaður deildarinnar, fór yfir starfssemina og las upp skýrslu stjórnar. Við látum hana fylgja hér í heilu lagi:
AÐALFUNDUR KÖRFUKNATTLEIKSDEILDAR KEFLAVÍKUR
FIMMTUD. 30. JAN. 2003
SKÝRSLA STJÓRNAR
Inngangur
Sú hefð hefur skapast á undanförnum árum að körfuknattleiksdeildin heldur í raun tvo aðalfundi á ári. Í janúar ár hvert, líkt og nú, er haldinn hinn formlegi aðalfundur deildarinnar í samræmi við lög félagsins, en það verður að segjast eins og er að þessi tímasetning hentar hvorki fyrir fjárhagslegt uppgjör né stjórnarskipti, þar sem starfsemin er frá hausti til vors. Þess vegna er veigamestu atriðum aðalfundar, svo sem kjöri stjórnar, iðulega frestað til framhalds-aðalfundar sem haldinn er að leiktíð lokinni, yfirleitt í maí, í samræmi við starfsemi deildarinnar. Kjöri stjórnar verður einnig frestað nú, ef samþykki fundarmanna fæst.
Í þessari skýrslu verður farið yfir starfsemi deildarinnar frá síðasta framhalds-aðalfundi sem haldinn var í júní s.l.
Árangur í keppni meistaraflokka
Skemmst er frá því að segja að árangur meistaraflokka félagsins á yfirstandandi leiktíð hefur verið mjög góður.
Meistaraflokkur karla vann sigur á æfingamótum haustsins, Valsmóti og Reykjanesmóti, og sigraði auk þess í Kjörísbikarnum í nóvember á ævintýranlegan hátt. Liðið er nánast óbreytt frá því í fyrra nema hvað einum stórum manni var bætt við liðið líkt og ákveðið hafði verið eftir lok síðustu leiktíðar. Kevin Grandberg kom til liðsins og lék með því út árið en í byrjun janúar var samningi við hann sagt upp og Ed Saunders gekk til liðsins í staðinn. Flestir leikmenn hafa leikið ágætlega í haust, en einna mesta athygli hefur Sverrir Þór Sverrisson vakið, sér í lagi fyrir ódrepandi keppnisskap og góðan varnarleik. Sigurður Ingimundarson þjálfar liðið í sjöunda skiptið í röð og Damon Johnson sem skömmu fyrir áramót fékk íslenskt ríkisfang leikur fyrir félagið í fjórða skiptið á sjö árum. Guðjón Skúlason lék fyrir stuttu sinn 700. leik fyrir félagið og var honum fært forláta úr að gjöf frá stuðningsmönnum félagsins. Núverandi leiktíð er sú 20. í röðinni hjá Guðjóni sem er 36 ára að aldri og lætur engan bilbug á sér finna. Gunnar Einarsson lék einkar vel á síðasta ári og var skömmu fyrir áramót valinn körfuknattleiksmaður Keflavíkur 2002. Framundan er úrslitaleikurinn í Bikarkeppninni þar sem við mætum Snæfelli líkt og fyrir 10 árum. Liðið hefur sýnt góða leiki upp á síðkastið og ef svo heldur fram sem horfir gerum við okkur vonir um að strákarnir geti jafnvel orðið Bikarmeistarar og/eða Íslandsmeistarar í ár.
Meistaraflokkur kvenna hefur leikið betur en nokkur þorði að vona. Lið þeirra er nær óbreytt frá síðustu leiktíð, nema hvað Marín Rós Karlsdóttir kom aftur til félagsins eftir ársdvöl í Bandaríkjunum. Sonia Ortega leikur með liðinu, en hún kom til liðsins fyrir úrslitakeppnina síðasta vetur. Anna María Sveinsdóttir þjálfar liðið annað árið í röð. Í haust hafa Erla Þorsteinsdóttir og Birna Valgarðsdóttir leikið sérlega vél og var Birna valinn körfuboltakona ársins 2002 af KKÍ. Stúlkurnar hafa leikið hraðan og skemmtilegan körfubolta og urðu, líkt og piltarnir, Kjörísmeistarar 2002, í fyrsta skipti í sögu félagsins. Alls hefur liðið unnið 20 af 21 leik í vetur, flesta með yfir 20 stiga mun, og þykir afar sigurstranglegt í keppnum vetrarins. Fyrr á árinu tók kvennaráð til starfa undir forystu Írisar Guðjónsdóttur. Kvennaráðið hefur staðið duglega við bakið á liðinu og fyrir vikið er öll starfsemin í kringum stúlkurnar með besta móti, ekki síst í tengslum við erlenda leikmanninn. Næsta stóra verkefni kvennaliðsins er Bikarúrslitin gegn ÍS og síðan tekur lokabarátta Íslandsmótsins við. Eins og staðan er núna eiga stúlkurnar alla möguleika á því að vinna bæði stóru mótin í ár, þótt vissulega sé ekkert öruggt í þeim efnum.
Unglingastarfið
Unglingastarfið er með miklum blóma nú sem oft áður. Iðkendur er um 250 í alls 14 flokkum drengja og stúlkna og líklega hefur ekkert félag á landinu fjölmennarara og öflugra unglingastarf í körfubolta. Haldið er utan um starfið af miklum myndarskap og margir hæfir þjálfarar eru við stjórnvölinn. Kristín Kristjánsdóttir stýrir unglingaráðinu með stykri hendi og ferst það vel. Töluverð áhersla hefur verið lögð á að virkja foreldra til samstarfs en það er lykilatriði að öflugu starfi. Unglingaráðið starfar að mestu leyti sjálfstætt og hefur t.d. umsjón með eigin fjármálum. Samstarfið við stjórn deildarinnar er þó töluvert varðandi ýmis málefni og hefur það samstarf gengið vel. Framundan er Samkaupsmót fyrir yngstu iðkendurna og síðan fjölmargir úrslitaleikir í Íslandsmóti og Bikarkeppni.
Árangur liðanna hefur verið prýðilegur það sem af er vetri og eru mörg okkar liða í fremstu röð á landinu, því er framtíðin mjög björt. Þó hefur Íslandsmeistaratitlum eitthvað farið fækkandi á undanförnum árum og af þeim sökum var á síðasta aðalfundi rætt um að auka þyrfti að nýju áherslu á árangur í yngri flokkum, eftir að ákveðnum aldri er náð. Er það talið mikilvægt til að keflvískir unglingar haldi áfram að alast upp með þeirri sigurhefð sem einkennt hefur starfið á liðnum tveimur áratugum, enda hefur ekkert félag unnið jafn marga Íslands- og bikartitla og Keflavík, þrátt fyrir ungan aldur körfuknattleiksdeildarinnar. Við skulum vona að þessi áherslubreyting skili áfram góðum árangri í hús.
Fjármálin
Á undanförnum tveimur árum hefur helsta markmið stjórnarinnar verið að koma fjármálum deildarinnar í þokkalegt horf, þar sem skuldir voru orðnar of miklar með tilheyrandi kostnaði. Með góðri stjórn, töluverðri heppni og dyggum stuðningi aðalstjórnar hefur málum nú verið komið í það horf að vel er starfandi. Fyrir liggur fjárhagsáætlun leiktíðarinnar sem reynt er að láta standast í hvívetna, þó allir viti að tekjuhlið rekstrarins er ávallt háð nokkurri óvissu. Þar munar mestu um fjölda áhorfenda, upphæð auglýsinga og styrkja, árangur meistaraflokka og gengi í ýmsum fjáröflunum. Tekjuhliðin er auðveldari í áætlun, en þó getur nokkru skeikað vegna ferðalaga í bikar- og úrslitakeppnum sem og gengi Bandaríkjadollars. Reksturinn fyrri hluta leiktíðar er aðeins undir áætlun vegna þess að fjáraflanir hafi ekki staðið undir væntingum, en þó gefur árangurinn í Bikarkeppninni tilefni til að ætla að áætlun geti haldið. Ársreikningurinn fyrir árið 2002 sýnir að deildin var rekin með um hálfrar milljóna króna hagnaði á árinu og nýttist sá hagnaður til vaxtagreiðsla. Eftir fjármagnsliði var reksturinn á núlli. Þetta uppgjör miðast við almanaksárið en ekki fjárhagsárið og gefur ekki réttu myndina, líkt og uppgjör að lokinni leiktíð gerir.
Rétt er hér að endurtaka það sem sagt hefur verið á hverjum aðalfundi í mörg ár, en það er að rekstur körfuknattleiksdeildar á að geta dansað í kringum núllið, þó stundum fari hann aðeins upp fyrir og stundum aðeins niður fyrir. Síðustu leiktíðir hefur stjórnin skilað nokkrum milljónum í rekstrarafgang sem farið hefur í niðurgreiðslu skulda og fjármagnsliði en nú vonumst við eftir að skila rekstrinum á núlli, líkt og ráð var gert fyrir í upphafi.
Örfá orð um viðskilnað körfuknattleiksdeildarinnar við Kevin Grandberg
Eins og áður segir var samningi deildarinnar við Kevin Grandberg sagt upp og Ed Saunders kom í staðinn. Í kjölfar þess varð töluvert fjaðrafok í körfuboltasamfélaginu á Íslandi og m.a. voru ritaðar greinar í Moggann og DV þar sem stjórn Keflavíkur var vænd um siðleysi og samviskuleysi af mönnum sem höfðu ekki áhuga á að afla sér upplýsinga um málið. Fyrst töldu reyndar margir að Keflavík hyggðist notast þrjá “útlendinga” og gagnrýndu það óspart, en þegar í ljós kom að svo var ekki, fóru menn, m.a. blaðamenn, að gagnrýna að Kevin hefði verið sagt upp skömmu eftir að tímabili félagaskipta lauk, þann 5. janúar. Stjórnin kaus að leggja ekki í blaðaskrif til að útskýra sín mál, þar sem slíkt gæfi færi á alls konar útúrsnúningum og málalengingum. Við vildum frekar stuðla að því að liðið fengi sem fyrst næði til að einbeita sér að leiknum á vellinum. Því voru málin útskýrð fyrir leikmönnum og aðalstjórn félagsins og þar við látið sitja.
Vegna þess sem rætt og ritað hefur verið teljum við þó rétt að nota þetta tækifæri til að upplýsa félagsmenn um að ákvörðunin um að segja upp samningi við Kevin var tekin þann 8. janúar og að hugmyndin fæddist eftir tapleik gegn Njarðvík, þann 7. janúar. Því var alls ekki um það að ræða að viljandi hefði verið beðið með að segja upp samningi fram yfir 5. janúar, atburðarásin fór hreinlega ekki í gang fyrr en að þeim degi liðnum. Stjórnin gerði sér grein fyrir afleiðingunum fyrir Kevin og bauðst til að aðstoða hann við að fá sér nýtt starf, þótt ljóst væri að það gæti ekki orðið við körfuboltaiðkun hér á landi.
Það verður að teljast undarlegt hve margir kusu að tjá sig um málið opinberlega án þess að reyna að afla upplýsinga hjá stjórninni um staðreyndir. Hinu má þó heldur ekki gleyma, að íslenskur körfuboltaheimur er að nánast öllu leyti sjálfboðamennska. En um leið og menn þiggja með einum eða öðrum hætti greiðslur fyrir íþrótt sína eru þeir komnir yfir í annan heim, ef svo má segja. Sá heimur er harðari, kröfurnar eru meiri og samningar eru uppsegjanlegir. Menn vita að hverju þeir ganga.
Stjórnin hafði heildarhagsmuni félagsins að leiðarljósi við aðgerð þessa og taldi nauðsynlegt að gera breytingu á liðinu til að styrkja það fyrir úrslitaátökin. Þótt enn sé kannski fullsnemmt að fullyrða nokkuð um endanleg áhrif þessarar breytingar, má þó auðveldlega greina að leikur liðsins hefur orðið betri í kjölfarið.
Endurbætur á íþróttahúsinu við Sunnubraut
Heimavöllur okkar, íþróttahúsið við Sunnurbraut, hefur gengið í endurnýjun lífdaga á liðnum mánuðum. Fyrst og fremst ber að minnast á nýja parkettgólfið sem hafði verið okkar helsta baráttumál til margra ára. Þar að auki voru settir upp nýjir áhorfendapallar á gólf hússins, bekkir sem eru meðfærilegir og góðir á allan hátt. Stjórnin er bæjaryfirvöldum og tómstunda- og íþróttaráði afar þakklát fyrir þeirra stuðning í þessum málum og veit að peningunum var vel varið í þágu afreksíþrótta, íþróttakennslu og æskulýðsstarfsemi í bænum. Húsið er sem nýtt og hafa breytingarnar vakið verskuldaða athygli og mikla ánægju.
Staða körfuboltans í Keflavík og á Íslandi
Á sama tíma og forysta körfuknattleikshreyfingarinnar, KKÍ, hyggst setja í gang átak til að fjölga stjórnarmönnum hjá aðildarfélögum, eigum við því láni að fagna að hafa fjölmennari stjórnarbatterí en nokkru sinni fyrr. Alls eru 7 menn í stjórn, 3 í varastjórn, 5 í kvennaráði og 6 í unglingaráði, alls 21, og allir mjög virkir. Þetta er frábær staða og starfið ber keim af því. Enda má segja að karfan í Keflavík sé í miklum blóma um þessar mundir, hvert í horn sem menn líta.
Engu að síður hefur áhorfendum fækkað frá þeim tíma þegar uppgangurinn var sem mestur, en þó má aftur merkja aukna áhorfendasókn á síðustu leikjum frá því í fyrra og hitteðfyrra. Þar kemur kannski til góður árangur, mikið umtal og breyttur leiktími, en föstudagarnir eru orðnir aðal leikdagar meistaraflokks karla að nýju og leikirnir hefjast fyrr en áður, kl. 19.15. Reyndar er enn nokkuð í land með að kvennaliðið fái það áhorf sem það á sannarlega skilið miðað við þá skemmtun sem stúlkurnar bjóða upp á.
Þegar staða körfunnar á Íslandi í heild sinni er skoðuð er nokkuð ljóst að við höfum upplifað betri tíma. Aðsókn hjá mörgum félögum er döpur og algengt er að sjá áhorfendatölur frá 50 til 150 í Mogganum, ekki þó í Keflavík, sem betur fer. Mönnum hefur verið tíðrætt um keppnisfyrirkomulagið og sumir blaðamenn hafa t.d. lagt til að leggja niður úrslitakeppnina, því vægi deildarkeppninnar sé orðið of lítið. Við teljum að skoða eigi alla möguleika og munum styðja breytingar til fækkunar liða í efstu deild til að auka spennuna. Einnig teljum við að skoða ætti möguleikann á því að fækka liðum í úrslitakeppni, án þess þó að leggja hana niður. Úrslitakeppnin hefur fyrir löngu sannað gildi sitt og er ávallt frábær hápunktur á hverri leiktíð.
Einnig má hér nefna stöðu íslenska landsliðsins. Við Íslendingar eigum nú orðið marga mjög góða leikmenn, svo sem Damon og Brenton (þó enn megi ekki nota þá báða í einu), Jón Arnór, Loga Gunnarsson og Friðrik Stefánsson svo nokkur dæmi séu tekin. Engu að síður er árangurinn lélegur og lið Íslands sem fyrir nokkrum árum var að veita Króatíu hörku keppni er nú farið að tapa fyrir Lúxemborg, svo nýleg dæmi séu tekin. Við teljum að verulega þurfi að efla landsliðið ef karfan á að öðlast meiri virðingu meðal landsmanna á næstu árum.
Lokaorð
Unglingastarfið hefur ávallt verið hjartað í starfsemi körfuknattleiksdeildarinnar í Keflavík. Starfið er gott og lykilatriði fyrir framtíðina er að auka enn frekar áherslu á unglingastarfið. Tilgangur unglingastarfsins er tvíþættur, annars vegar að halda úti félagsstarfi fyrir ungmenni bæjarins og hins vegar að sjá meistaraflokkum fyrir góðum leikmönnum og stuðla þannig að góðum árangri og áframhaldandi áhuga ungviðisins. Þetta er hringrás sem ekki má brotna. Ef góður árangur, gott unglingastarf og ábyrg fjármálastjórn fara saman, þurfum við ekki að óttast framtíðina.
Að lokum vill stjórnin þakka öllum þeim sem lagt hafa hönd á plóginn með okkur. Þar ber að nefna bæjarfélagið, íþróttafélagið okkar Keflavík og stjórn þess, sem og mýmörg fyrirtæki og einstaklinga. Það væri efni í heila bók að telja upp alla velvildarmenn körfuboltans í Keflavík. Við viljum þó sérstaklega geta Landsbankans sem stutt hefur okkur með ráðum og dáð í tæpan áratug og er okkar helsti samstarfsaðili.
Enn sem fyrr er starfið borið uppi af óeigingjarnri sjálfboðastarfsemi og svo mun verða um ókomna tíð. Það sem hvetur fólk til starfans er brennandi áhugi á íþróttinni og æskulýðs- og félagsstörfum, og þegar vel gengur er mjög gaman að vera tengdur körfunni í Keflavík.
Fyrir hönd stjórnar körfuknattleiksdeildar Keflavíkur
Hrannar Hólm, formaður
