Bikarhátíð í Keflavík um helgina
Mikil bikarhátíð fer fram í Keflavík um helgina þegar leikið verður til úrslita í Bikarkeppni KKÍ í yngri flokkunum. Mótið fer fram í Toyota höllinni við Sunnubraut og verður í umsjón Unglingaráðs Körfuknattleiksdeildar Keflavíkur. Leikar hefjast kl. 10.00 á laugardag og lýkur úrslitunum með lokaleik kl. 16.00 á sunnudag. Alls verða leiknir níu úrslitaleikir og eiga Keflvíkingar fjögur lið í úrslitum að þessu sinni sem verður að teljast góður árangur. KR ingar eiga einnig fjögur lið og UMFN stendur ekki langt að baki með þrjú lið í úrslitum.
Undanfarin ár hefur það komið í hlut félaganna að halda utan um bikarúrslitaleiki yngri flokkanna og hefur það gefið góða raun. Í fyrra voru það FSu menn og árin tvö þar á undan hélt KR utan um mótið. Bæði félögin gerðu þetta vel og hafa gefið tóninn fyrir framhaldið.
Að leika til úrslita í bikarkeppninni er frábær upplifun fyrir yngri leikmenn þar sem leitast er við að skapa alvöru umgjörð og stemmingu í kringum leikinn. Þannig verður þetta að hátíðlegum viðburði sem allir leikmenn vilja verða partur af á hverju ári.
Við hvetjum alla áhugamenn um körfubolta að fjölmenna um helgina og fylgjast með mesta efniviði körfuboltans í dag.
Unglingaráð KKDK
