Fjöldi körfuboltaleikja framundan
Margir leikir leikir eru á dagskrá hjá okkar fólki í körfunni næstu daga og stór hluti þeirra fer fram á heimavelli.
Í kvöld fimmtudag mætir Keflavík liði KR í 8-liða úrslitum bikarkeppni KKÍ í Drengjaflokki og hefst leikurinn kl. 20.00.
Á laugardag kl. 16.00 mæta stelpurnar í Keflavík B síðan Ármanni/Þrótti í toppslag 1.deildar kvenna. Uppistaðan í þessu liði eru stelpur úr ´93 og ´94 árgangi félagsins og hafa þær staðið sig hreint frábærlega í vetur. Þær hafa unnið sex leiki af átta og eru í harðri baráttu á toppi deildarinnar ásamt Njarðvík og Ármanni en öll þessi lið hafa unnið hvort annað í innbyrðis viðureignum.
Keflavík mætir síðan Val í undanúrslitum Subwaybikars kvenna á sunnudag og hefst leikurinn kl. 16.00.
Allir ofangreindir leikir fara fram í Toyota höllinni við Sunnubraut.
Um helgina hefst síðan 3. umferð Íslandsmóts yngri flokka.
Í A-riðli stúlknaflokks verður leikið bæði í Keflavík og að Ásvöllum í Hafnarfirði. Fyrsti leikur okkar stúlkna fer fram í Toyota höllinni á föstudagskvöld kl. 20.45 og verður það gegn Njarðvík. Annar leikurinn verður gegn liði Snæfells í Heiðarskóla kl. 10.30 á laugardag. Á sunnudag leika stelpurnar síðan við Fjölni kl. 9.00 og gegn Haukum kl. 12.00 og fara þeir leikir fram að Ásvöllum.
Í B-riðli 8.flokks karla verður leikið í Keflavík. Á laugardag mæta okkar drengir FSU kl. 10.00 og Fjölni kl. 13.00. Á sunnudag mæta þeir Valsmönnum kl. 10.00 og að lokum liði Breiðabliks kl. 13.00. Strákunum hefur vantað herslumuninn á að vinna sig upp í A-riðil í undanförnum mótum og nú er lag að nýta heimavöllinn til að ná því markmiði.
Í A-riðli 8.flokks kvenna verður leikið í Grindavík. Okkar stúlkur eiga leik á laugardeginum kl. 11.30 gegn Njarðvík og kl. 14.30 gegn Breiðablik. Á sunnudeginum mæta þær KR kl. 11.00 og að lokum Grindavík kl. 13.00.
Að lokum heldur 11.flokkur karla í Ljónagryfjuna hinum megin við lækinn og keppir í A-riðli í fyrsta skipti í vetur. Á laugardag mæta þeir heimamönnum kl. 9.30 og KFÍ kl. 12.30. Á sunnudag mæta þeir Breiðablik kl. 9.00 og Fjölni kl. 12.00. Ljóst er að erfitt verkefni bíður drengjanna að halda sér uppi á meðal A-liða og því óskandi að þeir bíti kröftuglega á jaxlinn og mæti urrandi til leiks.
Einnig skal þess getið að Póstmót Breiðabliks verður haldið í Smáranum um helgina en það er fyrir iðkendur á aldrinum 6-11 ára og fara nokkur lið frá Keflavík á það mót. Riðla og leikniðurraðanir má finna á heimasíðu Breiðabliks http://www.breidablik.is/frettir.php?id_teg=5
Allir áhugamenn um körfubolta eru hvattir til að reka nefið inn í íþróttahús næstu daga og fylgjast með okkar efnilega afreksfólki.
Áfram Keflavík
