Þessa helgina er stútfull körfuboltadagskrá og hæst ber seinni úrslitahelgi Íslandsmóts yngri flokka, en þá verða leiknir fimm úrslitaleikir um Íslandsmeistaratitil sem allir fara fram í DHL höllinni í Vesturbænum í umsjón KR. Allir leikirnir eru sýndir beint á KR-TV og lifandi tölfræði er send út á kki.is.

Keflavík komust í gærkvöldi í úrslit í Unglingaflokki karla þegar þeir lögðu lið Fjölnis 93-84 í undanúrslitum í afar kaflaskiptum leik og mæta þar geysisterku liði Njarðvíkur á morgun sem lagði lið Stjörnunnar 106-84.

Í dag vann síðan 10. flokkur stúlkna sér sæti í úrslitum þegar þær lögðu lið Tindastóls af velli 46-21 og mæta þar liði Hauka sem lögðu Njarðvík 49-27.

Keflvíkingar leika einnig í undanúrslitum í unglingaflokki kvenna í kvöld þar sem þær mæta liði Grindavíkur kl. 19.00.  Í hinum undanúrslitaleiknum mætast lið Njarðvíkur og Vals.

Allir úrslitaleikirnir verða leiknir á morgun, sunnudag sem fyrr segir og er dagskráin eftirfarandi:

9. fl. drengja, KR - Breiðablik kl. 09.00

10.fl. stúlkna, Keflavík - Haukar kl. 11.00

11.flokkur drengja, Grindavík - KR/Haukar kl. 13.00

Unglingaflokkur kvenna, Keflavík/Grindavík - Njarðvík/Valur kl. 15.00

Unglingaflokkur karla, Keflavík - Njarðvík  kl. 17.00

Samhliða seinni úrslitahelginni er lokamótið í 8. flokki kvenna leikið í Keflavík en þar sem 8. bekkur er fermingarárgangur þurfti að fresta lokamótinu þar til nú að þetta taldist fermingarfrí helgi fyrir öll keppnisliðin.

Lokaleikur mótsins fer fram kl. 14.00 á morgun í Tyotahöllinni og eftir hann verða Íslandsmeistarar krýndir.

Segja má að körfuboltadagskrá vetrarins, þ.e.a.s. mótahaldi sé lokið eftir þessa helgi og þá einu leikirnir sem eftir eru oddaleikurinn í meistaraflokki karla og lokahnykkurinn í einvígi Keflavíkur og KR í Dominosdeild kvenna.