Keflavík 1 - ÍS 0: Öruggur sigur í fyrsta leik, 80-56
Keflavíkurstúlkur byrjuðu ágætlega í kvöld og leiddu 8-2 eftir um 3ja mínútna leik. Svo var eins og að þær stífnuðu svolítið upp og ÍS náði að jafna 8-8, eftir slakan kafla. Um 8 mínútur voru liðnar og lítið hafði verið skorað. Þá hóf Keflavík að leika pressuvörn og við það opnaðist leikurinn og varð fjörugri. Keflavík náði undirtökunum og var 2 stigum yfir eftir fyrsta leikhluta, 17-15. Jafnræði var síðan fram í miðjan annan leikhluta og hélt ÍS sér inn í leiknum með góðri 3ja stiga hittni. En svo fór pressan að virka og Keflavík seig fram úr. Staðan var 43-30 í hálfleik.
Seinni hálfleikur byrjaði af krafti hjá Keflavík og sérstaklega var Erla Þorsteinsdóttir öflug og skoraði grimmt. Forystan jókst jafnt og þétt og við upphaf síðasta leikhluta var munurinn 18 stig. Fjórði leikhlut bauð upp á mikið af því sama og ljóst var að sigurinn var í höfn. Lokatölur voru 80-56 fyrir Keflavík.
Varnarleikur Keflavíkur var góður lengst af, nema hvað ÍS-stúlkur náðu ansi mörgum sóknarfráköstum. En um leið og hraðinn óx þá sigldu Keflavíkurstúlkur framúr. Þær náðu einnig að nýta vel yfirburðina undir körfunum og þær Erla (22 stig, 7 frák) og Anna María voru mjög góðar allan leikinn. Anna María átti stórleik og var ansi nálægt "þrefaldri tvennu", en hún var með 14 stig, 15 fráköst og 9 stoðsendingar.
Fyrir leikinn var Birna Valgarðsdóttir heiðruð af stjórninni fyrir að hafa leikið 200 leiki fyrir félagið. Leikurinn í kvöld var sá 203. og lék hún vel eins og svo oft áður, bæði í vörn og sókn, gerði m.a. 11 stig. Marín (10 stig) , Rannveig (2) og Erla R (14) áttu góðan dag gegn tvíeykinu Öldu Leif og Casie Lowman og héldu þeim ágætlega í skefjum, en sérstaklega átti Casie erfitt uppdráttar.
Eftir góða byrjun verður haldið í Kennaraháskólann á laugardaginn og má búast við Stúdínum grimmari á heimavelli.
Í seinni hálfleik féll einn leikmaður ÍS (Svana) í gólfið og fékk höfuðhögg. Hún var flutt á sjúkrahús til rannsóknar, en ekki var þó líklegt að meiðslin væru alvarleg. Við óskum henni góðs bata.
