Keflavík leiðir 1-0
Keflvíkingar unnu yfirburðasigur í kvöld þegar Snæfellingar mættu í Toyota Höllina, en lokatölur leiksins voru 97-78. Það var einstefna frá fyrstu mínútum leiksins hjá Keflavík og áttu Snæfellingar fá svör við öflugum varnarleik og snörpum sóknum Keflvíkinga. Sean Burton glímir við meiðsli og var víðs fjarri í þessum leik. Eflaust biðu margir eftir því að eitthvað myndi bresta hjá Keflavíkurliðinu og að Snæfellingar kæmu með öfluga syrpu sem myndi saxa vel á forskotið, en það gerðist aldrei. Þrátt fyrir að frákasta vel, þá voru Snæfellingar bara með hausinn í langtíburtuistan. Einnig virkuðu þeir mjög óöruggir í sóknarleik sínum, þar sem allir hentu reglulega boltanum á þann sem átti að klára. Málið var bara að það var enginn til að klára sóknina hjá þeim. Hlynur Bæringsson stóð sig á köflum þokkalega, en hann var ekki sérlega beittur í því að keyra inn undir körfuna og skora. Skelfileg hittni hjá liðinu var ekki eitthvað sem þeir þurftu á að halda ofan í þessa spilamennsku sína, því miður.
