Karfa: Konur | 5. nóvember 2013

Spennusigur á Stykkishólmi - Stutt viðtal við Söndru Lind

Keflvíkingar unnu sinn sjöunda leik í röð í Domino´s deild kvenna í körfubolta á sunnudag þegar liðið sigraði Snæfell með einu stigi, 68-69, en leikurinn fór fram á einum erfiðasta útivelli landsins á Stykkishólmi. Hjá Keflvíkingum voru þær Porsche Landry með 26 stjg, 5 fráköst og 8 stoðsendingar og Bryndís Guðmundsdóttir með 18 stig og 12 fráköst atkvæðamestar. Þá var Sara Rún Hinriksdóttir með 11 stig og 6 fráköst og Birna Valgarðsdóttir, sem mætt er aftur eftir meiðsli, með 6 stig og 6 fráköst. Aðrar voru með minna framlag.

Keflavíkurstúlkur eru nú með fjögurra stiga forskot á toppi deildarinnar eftir fyrstu umferðina en leiknar eru fjórar umferðir í Domino´s deild kvenna. Heimasíða Keflavíkur hafði samband við Söndru Lind Þrastardóttur sem leikið hefur stórt hlutverk í þessu góða gengi liðsins en auk þess að spila stífa vörn hefur Sandra átt gríðarlega mikilvægar körfur í lok leikja sem tryggt hafa liðinu sigur.

Jæja, mikill spennusigur á sunnudag - hvað skóp þennan sigur?

Ætli fráköstun hafi ekki verið númer 1, 2 og 3 eins og svo oft áður hjá okkur.

Nú hafi þið unnið öll liðin í deildinni og eruð taplausar, bjóstu við þessari stöðu fyrir tímabilið?

Nei, þetta kemur mér algjörlega í opna skjöldu. Ég eins og svo margir aðrir hélt að við værum nú bara að fara að verma 5. sætið.

Hvernig lýst þér á framhaldið?

Illa, þar sem við höfum ekki verið að leggja inn ný kerfi undanfarið en það hefur verið minn uppáhalds tími á æfingum hingað til.

Hvernig finnst þér tímabilið hafa gengið hjá þér persónulega?

Misvel.

Eitthvað að lokum Sandra?
Vil þakka stuðningsmönnunum sem sáu sér fært um að koma í Hólminn en það var nú bara hinn eini sanni Þröstur Ástþórsson a.k.a Sugardaddy sem mætti

Mynd: Sandra Lind í leik gegn Njarðvík. Myndin er fengin af vefsíðu Víkurfrétta, www.vf.is.