SÝNUM STYRK! - Bréf frá formanni deildarinnar
Jæja kæru Keflvíkingar, eftir langan og strangan vetur er meistaraflokkurinn okkar í karlaflokki kominn í ansi erfiða stöðu í úrslitakeppni Iceland Express deilarinnar.
Liðið okkar var sterkt í haust, en töluvert ólán, meiðsli og eigin klaufaskapur hafa gert að verkum að árangurinn hefur ekki verið í samræmi við það sem við eigum að venjast.
Það þarf ekki að tíunda útlendingavandræðin og meiðslasöguna, við okkur blasir á morgun einfaldlega sú staðreynd að leikurinn á morgun getur orðið okkar síðasti á þessari leiktíð. En staðreyndin er líka sú að leikurinn á morgun getur hæglega orðið upphafið að glæstum lokaspretti þar sem allt er mögulegt.
Við höfum oft lent í erfiðleikum en unnið okkur upp úr þeim með samhentu átaki, baráttu og sigurvilja. Allt er ennþá mögulegt, gleymum því ekki.
Ég er sannfærður um að ef leikmenn og áhorfendur leggjast á eitt, þá getum við vakið upp sigurvegarann sem sefur værum blundi inní okkur um þessar mundir.
Þess vegna vil ég skora á keflvíska stuðningsmenn að fjölmenna í Sláturhúsið á morgun og styðja kröftuglega við bakið á drengjunum. Ég vil líka skora á drengina í liðinu að minnast allra þeirra glæstu sigra sem við höfum unnið í sameiningu og sækja kraft í þær minningar.
Heimavöllurinn okkar hefur verið nánast ókleyfur múr fyrir andstæðinga svo árum skiptir og okkur ber að berjast til síðasta blóðdropa til að verja hann. Heiður okkar er í húfi!
Gleymum því ekki að það er engin skömm í því að tapa fyrir öflugum andstæðingi, en það er bara svo miklu meira gaman að vinna!
Baráttukveðja, Hrannar.
