Keflavík hefur samið við bandaríska bakvörðinn Porsche Landry um að leika með liðinu í vetur. Porsche lék með liði Houston Cougars í bandaríska háskólaboltanum, þar sem hún skoraði 16,6 stig og var með um 5 stoðsendingar að meðaltali í leik síðasta árið sitt.
Keflavík gekk í dag frá samningi við Michael Craion um að hann leiki með liðinu á komandi vetri. Þrátt fyrir að gengi Keflavíkurliðsins hafi ekki verið nógu gott á síðasta tímabili var Michael einn af jákvæðu punktum tímabilsins. Honum óx gríðarlega ásmeginn þegar líða tók á tímabilið og endaði hann með 22 stig, 13 fráköst og 2 stoðsendingar að meðaltali í leik.
Ísland mætir Danmörku í æfingaleik í körfubolta í kvöld kl. 19.15 en leikurinn fer fram í íþróttahúsi Keflavíkur.
Körfuknattleiksdeild Keflavíkur hefur hafið sölu á þessum glæsilegum grillsvuntum og hvetur alla sanna Keflvíkinga til að ná sér í eins og eitt stykki.
Áhugasömum er bent á að hafa samband við Davíð Þór í síma 869-6151 eða senda póst á david.thor.jonsson@gmail.com.
Almar Stefán Guðbrandsson, miðherji Keflavíkur, framlengdi samning sinn við félagið í gær. Almar lék rúmar 12 mínútur í leik á síðasta tímabili þar sem hann tók um 4 fráköst og skoraði 2.5 stig að meðaltali. Það er hins bæði trú stjórnar körfuknattleiksdeildar Keflavíkur og leikmannsins sjálfs að mun meira búi í þessum stóra og stæðilega leikmanni. Bindur félagið þar að leiðandi miklar vonir við Almar á komandi tímabili. Eins og flestir vita er Almar uppalinn Keflvíkingur og má segja að kappinn "blæði bláu" eins og maðurinn sagði...
Keflavík hefur gengið frá samningi við Gunnar Hafstein Stefánsson um að aðstoða Andy Johnston með þjálfun karlaliðs félagsins í vetur. Gunnar þarf vart að kynna fyrir stuðningsmönnum félagsins né áhugamönnum um íslenskan körfuknattleik enda kappinn með áralanga reynslu sem leikmaður Keflavíkur. Gunnar hóf að leika með meistaraflokki félagsins árið 1995 en lauk sínum ferli árið 2012. Gunnar lék allan sinn feril með Keflavík, að undanskildum tveimur árum, og er hann einn leikjahæsti leikmaður í sögu Keflavíkur. Sjórn körfuknattleiksdeildarinnar er gríðarlega ánægð með að Gunnar var tilbúinn í þetta verkefni þegar leitað var til hans enda þarf vart að fjölyrða um þá reynslu sem kappinn býr yfir auk þess sem hann þekkir alla innviði klúbbsins eins og best verður á kosið. Þó Gunnar sé hér að stíga sín fyrstu skref í þjálfun hjá meistaraflokki er kappinn enginn nýgræðingur á sviði þjálfunar þar sem hann hefur nokkra reynslu í þjálfun yngri flokka hjá félaginu.
Hið árlega kaffihlaðborð körfuknattleiksdeildar Keflavíkur verður á sínum stað í Myllubakkaskóla á 17. júní nk. Þar geta gestir gætt sér að gómsætum veitingum, s.s. heitum réttum, flatkökum og tertum ásamt rjúkandi heitu kaffi og gosi. Húsið opnar kl. 14.30 og er opið þar til dagskrá lýkur í skrúðgarðinum.
Í dag varð ljóst að Pálína Gunnlaugsdóttir, leikmaður Íslands- og bikarmeistara Keflavíkur, mun ekki framlengja samning sinn við félagið. Samningaviðræður milli Keflavíkur og Pálínu hafa staðið yfir í talsverðan tíma og varð félaginu fljótlega ljóst að erfitt yrði að verða við óskum leikmannsins auk þess sem hennar hugur virtist stefna annað. Pálína gaf að lokum andsvar við tilboði Keflavíkur í dag með þeim rökum að hún vildi takast á við nýjar áskoranir en þakkaði félaginu þó um leið fyrir þau 6 góðu ár sem hún lék með liðinu. Hún vildi þó ekki gefa upp hver hennar næsti áfangastaður yrði.
