Keflvíkingar töpuðu í gegn Grindavík í Toyotahöllinni í dag í 4-liða úrslitum Poweradebikarsins, 83-84. Það verða því aðeins stúlkurnar sem munu halda uppi heiðri Keflavíkur í bikarnum í ár en þær komust áfram í gær eftir nauman sigur gegn Snæfell.
Á morgun taka Keflvíkingar á móti Grindavík í 4-liða úrslitum Poweradebikarsins. Leikurinn hefst kl. 15.00 í Toyotahöllinni. Það yrði ekki amalegt ef drengirnir næðu að fylgja eftir góðum sigri stelpnanna í dag svo Keflavík eigi tvö lið í úrslitum. Valur Orri Valsson, leikstjórnandi Keflavíkur, hefur farið mikinn í vetur og verið einn besti íslenski leikmaður deildarinnar. Hann kveðst gríðarlega spenntur fyrir leiknum á morgun og vonast eftir því að stuðningsmenn Keflavíkur fjölmenni.
Keflavíkurstúlkur voru rétt í þessu að tryggja sér farseðil í úrslitaleik Poweradebikarsins með stórkostlegum sigri á Snæfell á Stykkishólmi, 70-73. Keflavíkurstúlkur voru undir í byrjun leiks en með flottum fjórða leikhluta náðu þær frumkvæðinu í leiknum og tryggðu sér glæstan sigur.
Í þessum rituðu orðum eru Keflavíkurstúlkur á leið á Stykkishólm þar sem þær munu etja kappi við heimastúlkur í Snæfelli um sæti í úrslitum Poweradebikarsins. Leikurinn hefst kl. 15.00 og því hafa stuðningsmenn Keflavíkur enn tíma til að henda sér upp í rennireiðar sínar og skunda af stað. Koma svo Keflvíkingar, styðjum stúlkurnar til sigurs!
Á sunnudaginn kl. 15.00 í Toyotahöllinni mun Keflavík taka á móti nágrönnum sínum úr Grindavík í 4-liða úrslitum Poweradebikarsins. Búast má við harðri viðureign og ljóst að bæði lið munu gefa allt í leikinn. Keflvíkingar munu án efa nýta sér styrk Michael Craion til hins ítrasta en hann hefur verið burðarstólpi liðsins það sem af er vetri og átt hvern stórleikinn af fætur öðrum undanfarið. Þannig leiðir kappinn Keflavík í stigaskorun, fráköstum og vörðum skotum en hann hefur skorað 22 stig, tekið 13.5 fráköst og varið 2 skot að meðaltali í leik í vetur. Sannkallað ofurmenni!
Keflavíkurstúlkur halda á Stykkishólm á morgun þar sem þær mæta Snæfelli í 4-liða úrslitum Poweradebikarsins kl. 15.00. Pálína Gunnlaugsdóttir, bakvörður- og fyrirliði Keflavíkur, segir að undirbúningur liðsins fyrir leikinn gangi vel. Pálína hefur leikið gríðarlega vel fyrir topplið Keflavíkur. Hún var valin leikmaður fyrri umferðarinnar í Domino´s deild kvenna á dögunum en það sem af er leiktíðinni er hún að skila 16 stigum, 5 fráköstum og 3 stoðsendingum að meðaltali í leik.
Aðeins tveir dagar eru í leik Keflavíkur og Grindavíkur í 4-liða úrslitum poweradebikarsins. Leikurinn fer fram í Toyotahöllinni kl. 15.00 sunnudaginn 27. janúar. Undirbúningur liðsins fyrir leikinn hefur staðið yfir frá því flautað var til leiksloka í sigurleiknum við Stjörnuna. Almar Guðbrandsson segir leikmenn Keflavíkurliðsins vel stemmda fyrir leilkinn og ætla sér sigur.
Keflavíkurstúlkur mæta Snæfelli í 4-liða úrslitum Poweradebikarsins nk. laugardag kl. 15.00 á Stykkishólmi. Keflavík hefur unnið alla leiki þessara liða í deildinni og ættu því að fara fullar sjálfstraust í leikinn, þó ljóst sé að um gífurlega erfiðan leik verður að ræða.
